◎《台文通訊》為現今持續發行時間最長，影響力最大的台文刊物。
◎上讚ê台文入門冊
《台文通訊》就是正港ê台灣文學寶庫，全部用台文書寫，用羅漢合寫ê形式來幫贊羅馬字初學者khah簡單來入門，koh用台文討論台灣族群ê運命，記錄、創作台灣魂ê性命故事。咱beh藉30冬這ê值得紀念ê日子，發行《台文通訊——30冬紀念特刊》，予愈來愈chē台灣人、甚至外國朋友，來了解咱台語ê文字kap記持，咱台灣人ê歷史。《台文通訊——30冬紀念特刊》是1本台灣人攏需要來讀ê入門冊。
◎介紹台文通訊運動史
這本紀念特刊咱特別邀請參與《台文通訊》ê關鍵人物來記錄、介紹台文通訊ê發展經過。有創辦人鄭良光先生、早期北美時期Toronto（多倫多）台文編輯小組蘇正玄先生。另外koh特別邀請有台語文專長ê有志對無kāng角度來評論、評價這份刊物ê意義kap特色。
◎早期文章、作者選集
編輯團隊ùi舊年開始討論beh收錄重刊ê文章kap內容，向望無讀過這份刊物、無讀過早期文章ê朋友，會使真簡單來認bat這份刊物ê特色kap重點。咱有推薦整理幾ê代表性ê作家專欄，mā有照文章ê性質來分類、介紹。這是1本beh了解台語文運動、台語文學、《台文通訊》上好ê入門冊！
◎參與者30冬回顧
除了背景介紹kap早期文章選集，咱koh去邀請過去有參與著這份刊物ê有志來做30冬ê回顧，有歷任總編輯、全世界聯絡處ê負責人、作者、讀者等等，來分享in對這份刊物ê記持kap心情。
◎刊物、作者原稿公開
Tī《台文通訊——30冬紀念特刊》內底，除了文字記錄，咱koh特別kā早期《台文通訊》1寡寶貴ê資料用相片ê方式來呈現予大家看，有《台文通訊》專用ê批紙、《台文通訊》原稿、重要台文作家ê手稿等等。這攏是頭1擺公開ê資料，邀請大家共同見證咱家己ê台語文學史、台語運動史！
